Hot! 為協助受是次疫情影響嘅各行各業,字幕工具現時免費開放使用,方便大家製作影片、線上課程或為線上會議轉錄筆記。

Subanana 使用流程詳解

作者: Aric Fung,  24 Aug 2020 in 使用教學
Image

自古以來,幫影片配字幕都係一件不可或缺,但又非常之浪費人力物力嘅事。為咗幫助大家更有效率地處理字幕,我哋就製作咗一套廣東話字幕工具-「字幕𠹌」,利用 AI 自動產生字幕,再配合簡單易用嘅介面,支援一眾畀字幕折磨多時嘅朋友。


Image

1. AI 快速自動產生字幕

「字幕𠹌」運用廣東話語音辨識技術,專門為廣東話嘅影片自動產生字幕,仲可以處理到中英夾雜同含有廣東話獨有字詞嘅影片。處理時間方面,「字幕𠹌」會喺影片上傳之後一次過進行聲軌分離、辨識同字幕產生,一般 10 分鐘嘅影片大約只需要 30 秒鐘就已經完成,唔需要到播放影片嘅一刻先進行轉換,方便快捷。

2. 線上平台-無需下載、安裝

同一般嘅字幕產生工具唔同,「字幕𠹌」由產生字幕、調整文字到輸出全部都係線上平台上面完成,用家唔需要登記、下載或者安裝任何嘅軟件已經可以使用「字幕𠹌」嘅所有功能,隨時都可以喺唔同嘅裝置上面使用。

3. 支援免費使用

最緊要:免費。整套工具由 AI 字幕產生到修改嘅工具全部都開放畀大家免費使用。當然,我哋亦都有 Premium 模式提供畀唔想自己進行校對嘅用家選擇,由操流利廣東話嘅專業團隊幫手處理整個過程,只需要坐定定喺度收 .srt 字幕檔就 OK。唔介意自己進行校對工作嘅用家,「字幕𠹌」絕對係個免費而又幫到你嘅工具。

4. 點解會開放呢個工具免費畀人用?

嗱,字幕𠹌,好多朋友都問我哋,點解會開放呢個工具免費畀人用?我哋喺一班香港土生土長,畢業左大約兩年嘅 IT 狗,營運緊一間科技初創。我哋致力將 AI 技術融合每個人日常生活當中,幫忙處理人唔應該浪費時間嘅事務。無論喺香港本土嘅「YouTuber」,抑或喺受疫情影響,唔同需要運用影片或錄音處理日常業務嘅行業。我哋希望可以免費提供呢套工具畀大家處理字幕需求,一方面鼓勵大家多啲使用粵語字幕,守護粵語文化;同時希望廣納粵語數據資料,協助完善被各大科技巨頭遺忘嘅粵語相關 AI 語音服務。


介紹「字幕𠹌」

為咗更清楚地介紹「字幕𠹌」,我哋比較咗其中一個受歡迎而又支援粵語嘅字幕軟件「 pyTranscriber 」*。

Image
*備註:有關 pyTranscriber 嘅比較係根據基本資料搜集同個人使用經驗,唔同嘅工具都會有自己嘅特點,建議用家親自嘗試,搵出最適合自己嘅工具。

使用流程

上傳影片

除咗直接上傳 電腦硬碟 入面嘅影片之外,你仲可以用 YouTube Link 嚟載入影片,方便你幫一啲已經上傳咗但又未加字幕嘅影片補返個字幕。

Image

完成上傳之後,「字幕𠹌」嘅 AI 就會根據影片嘅聲軌自動產生 字幕 同埋對應嘅 時間軸 (Timestamp)。10 分鐘嘅影片大約只需要 30 秒鐘就已經完成,斟杯水返到嚟就搞掂。

Image

字幕校對

再好嘅 AI 都需要人手嘅輔助。想有啱心水嘅字幕,根據自己嘅風格同常用字詞去進行校對係不可或缺嘅。呢個時候,一套方便嘅介面同工具就可以幫你事半功倍。

Image

分割/整合句子

第一步需要做嘅就係 分割整合 句子。雖然 AI 已經根據影片聲音嘅停頓位進行咗分割,但都會有需要調整嘅地方。

做法:點擊你想分割/整合嘅句子 > 點擊「分割/匯合」

Image

分割句子:點擊 兩個詞語/標點符號中間「分割」

Image

Image

匯合句子:點擊 兩句中間「匯合」

Image

Image

注意:記得完成晒所有分割/整合句子嘅動作先至好修改句子入面嘅文字,因為修改咗嘅句子就唔可以再割㗎啦。

修改文字

er…就係改返啲啱嘅字。

Image

做法:點擊你想改字嘅句子 > 點擊「修改文字」

Image

Image

儲存

「字幕𠹌」會 即時 幫你自動儲存所有嘅修改動作, 就好似 Google Doc 咁。

Image

分享

如果想分享(射波)畀其他人幫手做,可以 Mouse Over 到右上角嘅「連結」圖示,再 Share 出現嘅連結就可以。

Image

注意:如果兩個人同時進行修改,系統會以最後儲存嗰一位嘅進度為準。為咗避免悲劇嘅發生,我哋建議同一時間都係一個人修改好啲。

輸出

完成之後,只要點擊右上角嘅「下載字幕」就可以直接下載 .srt 檔案,方便你接駁常用嘅剪片軟件。

Image

Premium 模式

覺得要自己校對同改字好麻煩?「字幕𠹌」都有提供 Premium 服務模式,由專業兼操純正廣東話嘅團隊幫你完成所有調整工作,直接取得 .srt 字幕檔或者已經嵌有字幕嘅影片,團隊仲會根據你嘅常用風格/用字處理,確保做出啱你心水嘅字幕。

Image

有字幕要打?即刻試用「字幕𠹌」啦:https://bit.ly/2FcCi1I

有任何問題,歡迎你用以下嘅方式聯絡「字幕𠹌」團隊-