Subanana 全新功能－即時翻譯
前言
喺呢個 AI 發展得咁蓬勃嘅年代，效率至上，愈嚟愈少人會親自落手寫 Blog。不過我又想做個實驗，趁住字幕𠹌 Subanana 有新功能推出，親手寫篇文章介紹一下呢個落足心機整嘅 「即時翻譯」。
唔知呢種有溫度嘅文字，會唔會令你睇得舒服啲？
一句講晒，呢個「即時翻譯」功能有咩特別？
1. 開會、講座、活動、展覽即時睇到精準字幕同翻譯
Subanana「即時翻譯」結合咗最先進嘅即時語音辨識技術 (Live Automatic Speech Recognition, Live ASR) 同大型語言模型 (Large Language Model, LLM)，即時根據演講內容產生字幕，一兩秒鐘做埋翻譯，真正打破語言限制，每個人都聽 (睇) 得明你講緊乜。
2. 登入即用，唔使下載、唔使安裝
「即時翻譯」所有功能都可以喺線上工具入面完成，用家（活動主辦方）唔需要下載或者安裝任何嘅軟件，有部上到網嘅電腦就用到，而且設定非常簡單，個個都識用！
3. QR Code 一鍵觀看、分享
「即時翻譯」特別設有多個觀看頁面－除咗主辦方嘅大螢幕，觀眾仲可以用自己部電話睇字幕同翻譯。活動結束之後，頁面亦可以作為記錄分享畀未能參與嘅人士，一舉多得。
4. 香港本土公司，專為處理廣東話而設
呢樣唔使多講，「字幕𠹌Subanana」由 2020 年創立以嚟一路專注做廣東話字幕同語音辨識。雖然而家已經支援超過 80 種語言，但廣東話依然係我哋嘅主要目標，希望幫到香港公司應用最新嘅科技解決問題。
免費試用 Subanana 「即時翻譯」「即時翻譯」使用流程
1. 建立 Subanana 帳號
如果你仲未有 Subanana 帳號，可以去 Subanana 開帳號，用 Email、Google 或者 Microsoft 登記都得。
2. 揀選「即時翻譯」
登入後，喺 Subanana 工具頁面左上角揀選「即時翻譯」，就可以去到「即時翻譯」嘅頁面。
3. 建立新一節「即時翻譯」
喺頁面左上角點擊「＋建立新即時翻譯」，輸入 Session 嘅名稱，再設定來源語言 (Audio source language) 同目標語言 (Target translate langauge)，就可以成功建立你嘅「即時翻譯」。
- 來源語言－係指活動／會議講者所講嘅語言。由於 Subanana「即時翻譯」會同時提供來源語言嘅即時轉譯（即係出字幕），所以如果你個活動係講廣東話，記得揀返來源語言嘅字幕想出口語定係書面語。
- 目標語言－係指你想翻譯成嘅語言。
例子：我個活動係講廣東話，想出中文書面語同翻譯埋做英文字幕，「來源語言」就揀－廣東話 ‧ 書面語、「目標語言」就揀－英語。
4. (選擇性) 設定進階選項
你可以根據需要加入詞彙參考表，例如活動名稱、公司同機構嘅術語去令 AI 更容易明白同出到專有名詞、縮寫同特定術語，熟悉 AI 提示詞 (Prompt) 嘅朋友都可以自訂轉錄提示同翻譯提示。一般嚟講乜都唔使搞用我哋預設嘅就可以！
5. 開始「即時翻譯」
完成所有設定之後就可以撳「＋建立即時翻譯」。入到去即時翻譯嘅頁面，喺右邊撳「開始錄音」，系統就會自戶連接你部電腦嘅 Mic 作為輸入嘅音源。如果系統聽到你講嘢，頁面上就會開始顯示來源語言同目標語言翻譯嘅字幕，有就代表已經成功啦！
6. 用「顯示介面」睇字幕同翻譯
成功開始「即時翻譯」之後，如果你想用同一部機做埋字幕顯示，你可以喺右上角撳「開啟顯示介面」。喺呢個介面，你可以視乎場合需要揀到：
- 顯示邊一種字幕
- 字體大細
- 深／淺色嘅介面
7. 用 QR Code 分享「即時翻譯」
你可以喺本身嘅管理員介面右上角搵到「分享」，撳落去之後會有條 Link 或者 QR Code，分享畀參與活動／會議嘅人佢哋就可以喺自己部電話或者電腦上面睇到「即時翻譯」，仲可以自己調校顯示設定，滿足晒所有人！
活動之後呢個介面仲可以做埋記錄，畀參與唔到嘅朋友睇返，非常方便！
8. 結束「即時翻譯」
活動／會議完結之後，你可以喺管理員介面撳「結束」，系統就會整理返轉錄嘅記錄，方便活動後進行分享，一個完整嘅「即時翻譯」環節就完成啦！
免費試用
最後，而家每個用戶都有 5 分鐘嘅「即時翻譯」試用限額，即刻去 Subanana 試下啦～
常見問題
邊個啱用 Subanana「即時翻譯」？
- 從事會展活動產業 (MICE) ，包括會議 (Meetings)、獎勵 (Incentives)、討論會 (Conferences) 同展覽 (Exhibitions) 界別嘅朋友 ，尤其是涉及不同語言、國家參與者嘅活動
- 教育、學術、醫療界別，經常要搞展覽、講座同研討會嘅朋友
- 大公司內部牽涉不同地方團隊同語言嘅線上會議等等
而家市面上咁多工具，點解要用 Subanana？
Subanana 由 2020 年推出以嚟不斷進步，喺準確度、易用程度定支援都係處於領先地位。時至今日淨係香港已經有超過 60,000 位用戶，係最多香港創作者及公司選用嘅 AI 字幕工具。開發團隊一直將重心同資源改用於善用戶體驗，整合最先進嘅 AI 技術，務求將最好嘅工具帶畀香港嘅用家。
Subanana 背後團隊係邊個？
Subanana 由 Datax 創立同營運。我哋係一班香港土生土長，畢業咗差唔多 8 年嘅 IT 狗。由 2017 年幾個人發展到而家超過 20 人嘅專業 AI 團隊。除咗 Subanana 之外，我哋已經為香港各大嘅機構同客戶提供超過 40 個 AI 語音識別、OCR 文件處理等方案，商業落地經驗豐富，深受客人嘅信賴。
如果我用 Subanana 遇到問題，可以搵邊個？
我哋通過電郵同即時訊息提供全面嘅客戶支援，隨時準備幫你解決任何問題。有任何疑問請經 hello@subanana.com 或者網頁上面嘅 Live Chat 搵我哋。
結語
多謝睇到嚟呢度嘅朋友。其實呢兩年各行各業嘅兢爭都好激烈，經營一間公司真係非常困難。我哋可 以做嘅都係咬緊牙關，努力做好自己覺得啱嘅事。我唔夠膽話我哋嘅 AI 工具十全十美，亦都知道一定有好多改善嘅地方；但我夠膽承諾每一個 Product、每一個功能都係團隊嘔心瀝血嘅成品。
所以真心希望大家用嘅時候有任何意見，讚嘅彈嘅都可以唔使客氣，直接話我哋知。因為我哋由始至終都係得一個目標，就係做最啱香港人用嘅 AI 工具。
加油，共勉之。